लिनु पर्ला राजनीतिबाट सन्यास ? (कविता)

खर्च गरेरै भएपनि नोट
चुनावमा हात पारेकै हो भोट
लाग्यो सल्लाह र सहमतिको चोट
लगाउनै दिएनन् दौरा र कोट
साह्रै गहिरो यो पदको प्यास
लिनु पर्ला राजनीतिबाट सन्यास ?

कति लगाउनु अरुलाई घुर्की
आफ्नै साथी आउछन पाखुरा सुर्की
फुच्चेहरु पनि जान्ने भएछन हुर्की
हिंड्नु बेकार छ, देखाएर फुर्ती
कति गर्नु उदघाटन र शिलन्यास
लिनु पर्ला राजनीतिबाट सन्यास ?

देखेर जनताको हातको डण्डा
सोच्नै पर्ला राखेर दिमाग ठण्डा
समय बित्यो गर्दैमा भाग र बण्डा
खालो सर्ने देखिन, बोकेर झण्डा
अझै कति गर्नु देशको बिनास
लिनु पर्ला राजनीतिबाट सन्यास ?

बदनाम गरेरै भएपनि नाम
मनपरी गरियो सरकारी दाम
थुप्रै भएछन्, किर्ते काम
बल्ल लाग्दैछ, घैटोमा घाम
मनग्गे भयो, मनको मिठास
लिनु पर्ला राजनीतिबाट सन्यास ?

कसैलाई गाह्रो पाउनलाई अन्न
आफूलाई पुग्यो, भयो टन्न
खै कति जोडियो सक्दिन गन्न
पर्‍या छैन, अब नेता बन्न
कुनै बेला त लाग्छ साह्रै अत्यास
लिनु पर्ला राजनीतिबाट सन्यास ?