म पनि प्रधानमन्त्रीको दाबेदार

अंक गणितको त माहिरै हुँ

ऐच्छिक गणित पनि घोकेको छु  

सत्ताको जोड घटाऊ सिकेकै छ

भागबण्डाको भाषण दिएकै छ 

लागेन त मेरो कुरा दमदार

म पनि प्रधानमन्त्रीको दाबेदार । 

अर्थशास्त्रको उच्च बिद्धान हुँ

करको दायरा दामी पार्नेछु

छानो निकालेर छत लगा’कै हो

भत्ता झिकेर भात खा’कै हो

छैन् त मेरो कुरा वजनदार

म पनि प्रधानमन्त्रीको दाबेदार

कुटनीतिको त कुरै छोड्नुुस

लुटनीतिको पनि ज्ञान छ 

दक्षिणको फुर्तिलाई दबाउन

उत्तरको अस्त्र उत्तम छ 

भेटिएन अझै यो देशको पहरेदार 

म पनि प्रधानमन्त्रीको दाबेदार । 

दातृ राष्ट्रसँग दान लिनेनै छु

भातृ संस्थालाई भरोसा दिलाउने छु 

कर्मचारीलाई काईदा हुनेछ

कार्यकर्तालाई फाइदा हुनेछ 

जनताको लागि मजेदार

म पनि प्रधानमन्त्रीको दाबेदार । 

चुनावमा पनि चुनिएकै छु

थुनामा पनि थुनिएकै हँु

सबैको हातमा संविधान दिनेछु

शान्ति र सुरक्षा सदावहार पार्नेछु

तपाईको एक मात्र भरोसेदार

म पनि प्रधानमन्त्रीको दाबेदार ।